Enwi, cychwyn a chymhwyso

1.–(1) Enw'r Rheoliadau hyn yw Rheoliadau Deddf Diogelu Grwpiau Hyglwyf 2006 (Cyfnod Rhagnodedig a Swyddog Priodol) (Cymru) 2010 a deuant i rym ar 26 Gorffennaf 2010.

(2) Mae'r Rheoliadau hyn yn gymwys o ran Cymru.

Dehongli

2.–(1) Yn y Rheoliadau hyn–

• ystyr "Deddf 2006" ("the 2006 Act") yw Deddf Diogelu Grwpiau Hyglwyf 2006;

• ystyr "penadur" ("principal") yw'r person a benodwyd yn benadur sefydliad addysg bellach;

• mae i "perchennog" yr ystyr a roddir i "proprietor" gan adran 579 o Ddeddf Addysg 1996(2);

• ystyr "prif swyddog addysg" ("chief education officer") yw'r person a benodwyd yn unol ag adran 532 o Ddeddf Addysg 1996(3);

• ystyr "sefydliad addysg bellach" ("further education institution") yw sefydliad yn y sector addysg bellach o fewn ystyr adran 91 o Ddeddf Addysg Bellach ac Uwch 1992(4) ac sydd fel arall yn sefydliad addysgol o fewn ystyr adran 8(5) o Ddeddf 2006;

• ystyr "unigolyn cyfrifol" ("responsible individual")–

  (i)

  unigolyn a chanddo reolaeth gyffredinol dros reoli'r ysgol o ddydd i ddydd; neu

  (ii)

  pan fo'r rheolaeth honno yn cael ei rhannu rhwng dau neu ragor o unigolion, yr un ohonynt a enwebir gan y perchennog i fod yn unigolyn cyfrifol;

• mae i "ysgol" yr ystyr a roddir i "school" gan adran 4 o Ddeddf Addysg 1996(5); ac

• ystyr "ysgol annibynnol" ("independent school") yw ysgol nas cynhelir gan yr awdurdod lleol ac sydd fel arall yn sefydliad addysgol o fewn ystyr adran 8(5) o Ddeddf 2006.

Cyfnod Rhagnodedig

3. At ddibenion adran 13(1) o Ddeddf 2006 y cyfnod rhagnodedig yw cyfnod sydd o fewn pedwar mis i'r dyddiad y gwnaeth person a benodwyd i gorff llywodraethu sefydliad addysgol–

(a) cydsynio i'r swyddog priodol wneud gwiriad yn unol ag adran 15(2)(a) o Ddeddf 2006; a

(b) darparu unrhyw wybodaeth sy'n ofynnol i wneud y gwiriad hwnnw i'r swyddog priodol.

Swyddog Priodol

4.–(1) At ddibenion adran 13(5) o Ddeddf 2006, y swyddog priodol–

(a) mewn perthynas ag ysgol annibynnol, yw ei hunigolyn cyfrifol;

(b) mewn perthynas â sefydliad addysg bellach, yw ei benadur; ac

(c) mewn perthynas ag unrhyw sefydliadau addysgol eraill, yw prif swyddog addysg yr awdurdod lleol lle mae'r sefydliad addysgol wedi'i leoli.

Nodyn Esboniadol

(Nid yw'r nodyn hwn yn rhan o'r Rheoliadau)

Mae Deddf Diogelu Grwpiau Hyglwyf 2006 ("Deddf 2006") yn darparu'r fframwaith deddfwriaethol ar gyfer cynllun newydd ynghylch fetio a gwahardd i bobl sy'n gweithio gyda phlant ac oedolion hyglwyf. Mae adran 13 o Ddeddf 2006 yn ei gwneud yn ofynnol bod gwiriad yn cael ei wneud mewn perthynas ag unrhyw berson sy'n cael ei benodi i gorff llywodraethu sefydliad addysgol. Mae methu â gwneud gwiriad yn dramgwydd. Mae'r Rheoliadau hyn yn rhagnodi, at ddibenion adran 13, y cyfnod y mae'n rhaid i'r gwiriad hwnnw gael ei wneud ynddo a'r swyddog priodol sy'n gyfrifol am ei wneud.

Gan hynny, y cyfnod rhagnodedig yw cyfnod sydd o fewn pedwar mis i'r dyddiad y cydsyniodd person a benodwyd i gorff llywodraethu sefydliad addysgol i'r swyddog priodol wneud gwiriad a darparu unrhyw wybodaeth sy'n ofynnol i wneud y gwiriad hwnnw i'r swyddog priodol. Y swyddog priodol ar gyfer ysgol annibynnol yw'r perchennog ac, ar gyfer sefydliad addysg bellach, y penadur. Mewn cysylltiad â phob sefydliad addysgol arall, prif swyddog addysg yr awdurdod lleol yw'r swyddog priodol.