Enwi, cymhwyso a chychwyn

1.–(1) Enw' r Rheoliadau hyn yw Rheoliadau Cynllun Taliad Sengl a Chynlluniau Cymorth y Polisi Amaethyddol Cyffredin (Cymru) 2010.

(2) Mae'r Rheoliadau hyn yn gymwys o ran Cymru, ac yn dod i rym ar 16 Awst 2010.

Dehongli

2.–(1) Yn y Rheoliadau hyn–

• ystyr "Rheoliad y Comisiwn" ("the Commission Regulation") yw Rheoliad y Comisiwn (EC) Rhif 1120/2009 dyddiedig 29 Hydref 2009 sy'n pennu rheolau manwl ar gyfer gweithredu'r cynllun taliad sengl y darperir ar ei gyfer yn Nheitl III o Reoliad y Cyngor (EC) Rhif 73/2009(3); ac

• ystyr "Rheoliad y Cyngor" ("the Council Regulation") yw Rheoliad y Cyngor (EC) Rhif 73/2009 dyddiedig 19 Ionawr 2009 sy'n sefydlu rheolau cyffredin ar gyfer cynlluniau cymorth uniongyrchol i ffermwyr o dan y polisi amaethyddol cyffredin ac yn sefydlu cynlluniau cymorth penodol i ffermwyr(4).

(2) Mae unrhyw gyfeiriad yn y Rheoliadau hyn at offeryn yr UE yn gyfeiriad at yr offeryn hwnnw fel y'i diwygir o bryd i'w gilydd.

Rhanbarth

3. Mae Cymru yn rhanbarth sengl at ddibenion Erthygl 46(2) o Reoliad y Cyngor.

Maint lleiaf daliad ar gyfer sefydlu hawlogaethau

4. At ddibenion Erthygl 25(4) o Reoliad y Comisiwn maint lleiaf daliad y ceir gwneud cais am sefydlu hawlogaethau i daliad ar ei gyfer yw 0.3 hectar.

Hawliad lleiaf

5. At ddibenion Erthygl 28(1) o Reoliad y Cyngor y lleiafswm sy'n ofynnol ar gyfer hawliad yw un hectar yn achos ffermwyr nad ydynt yn dal hawlogaethau arbennig yn unol â'r Erthygl honno, a 100 yn achos ffermwyr sy'n dal hawlogaethau arbennig.

Dyddiad pan fo rhaid i dir cymwys fod ar gael at ddefnydd y ffermwr

6. Mewn perthynas ag unrhyw flwyddyn pan fo'r ffermwr yn gwneud datganiad ynglŷn â pharseli yn unol ag Erthygl 35(1) o Reoliad y Cyngor, y dyddiad pan fo rhaid i'r parseli hynny fod ar gael at ddefnydd y ffermwr yw 15 Mai yn y flwyddyn honno.

Modiwleiddio gwirfoddol

7. Y cyfraddau yn nhrydedd golofn yr Atodlen yw'r modiwleiddio gwirfoddol y cyfeirir ato yn Erthygl 1 o Reoliad y Cyngor (EC) Rhif 378/2007 dyddiedig 27 Mawrth 2007 sy'n pennu rheolau ar gyfer modiwleiddio yn wirfoddol y taliadau uniongyrchol(5).

Coedlannau cylchdro byr

8. At ddibenion Erthygl 2(n) o Reoliad y Comisiwn–

(a) y rhestr o rywogaethau coed yw–

• Gwern (Alnus spp.);

• Bedw (Betula spp.);

• Cyll (Corylus avellana);

• Ynn (Fraxinus excelsior);

• Pisgwydd (Tilia cordata);

• Castanwydd (Castanea sativa);

• Masarn (Acer pseudoplatanus);

• Helyg (Salix spp.);

• Poplys (Populus spp.);

• Oestrwydd (Carpinus spp.); a

(b) y cylchdro cynaeafu hwyaf yw 20 mlynedd.

Hawlogaethau i daliad

9. Yn unol â'r trydydd is-baragraff o Erthygl 43(1) o Reoliad y Cyngor, ni cheir defnyddio na throsglwyddo hawlogaethau i daliad o dan y cynllun taliad sengl, sydd i' w priodoli i Gymru ac a sefydlwyd yng Nghymru, ac eithrio o fewn Cymru.

Dirymu

10. Dirymir y Rheoliadau canlynol–

(a) Rheoliadau Cynllun Taliad Sengl a Chynlluniau Cymorth y Polisi Amaethyddol Cyffredin (Cymru) 2005(6);

(b) Rheoliadau Cynllun Taliad Sengl a Chynlluniau Cymorth y Polisi Amaethyddol Cyffredin (Cymru) (Diwygio) 2006(7);

(c) Rheoliadau Cynllun Taliad Sengl a Chynlluniau Cymorth y Polisi Amaethyddol Cyffredin (Cymru) (Diwygio) 2008(8);

(ch) Rheoliadau Cynllun Taliad Sengl a Chynlluniau Cymorth y Polisi Amaethyddol Cyffredin (Cymru) (Diwygio) 2009(9);

(d) Rheoliadau Cynllun Taliad Sengl y Polisi Amaethyddol Cyffredin (Neilltir) (Cymru) 2005(10);

(dd) Rheoliadau Cynllun Taliad Sengl y Polisi Amaethyddol Cyffredin (Neilltir) (Cymru) (Diwygio) 2006(11).

Rheoliad 7

ATODLEN Cyfraddau modiwleiddio gwirfoddol

Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn yn gwneud darpariaeth, mewn perthynas â Chymru, ar gyfer gweinyddu Rheoliad y Cyngor (EC) Rhif 73/2009 (OJ Rhif L 30, 31.1.2009, t. 16), ac offerynnau cysylltiedig eraill yr UE (Undeb Ewropeaidd), mewn perthynas â chynlluniau cymorth uniongyrchol o dan y Polisi Amaethyddol Cyffredin.

Maent yn parhau'r trefniadau a oedd yn gymwys o dan Reoliadau Cynllun Taliad Sengl a Chynlluniau Cymorth y Polisi Amaethyddol Cyffredin (Cymru) 2005, O.S. 2005/360 (Cy.29) fel y'i diwygiwyd.

Mae rheoliad 3 yn darparu bod Cymru'n rhanbarth sengl at ddibenion y cynlluniau cymorth uniongyrchol.

Mae rheoliad 4 yn pennu maint lleiaf daliad y ceir gwneud cais am sefydlu hawlogaethau mewn perthynas ag ef.

Mae rheoliad 5 yn gosod yr arwynebedd lleiaf y ceir gwneud hawliad mewn perthynas ag ef, ac mewn rhai achosion, gwerth lleiaf yr hawliad.

Mae rheoliad 6 yn pennu'r dyddiad pan fo rhaid i barseli, a ddefnyddir fel sail i hawliad o dan y Cynllun Taliad Sengl, fod ar gael at ddefnydd ffermwyr.

Mae rheoliad 7 yn pennu cyfanswm y didyniadau modiwleiddio gwirfoddol a wneir o daliadau uniongyrchol sy'n daladwy i ffermwyr.

Mae rheoliad 8 yn dynodi pa rywogaethau o goed ar gyfer coedlannau cylchdro byr sy'n gymwys o dan y cynllun taliad sengl ac yn pennu'r cylchdro cynaeafu hwyaf.

Mae rheoliad 9 yn darparu mai o fewn Cymru yn unig y ceir defnyddio a throsglwyddo hawlogaethau i daliad a sefydlwyd yng Nghymru.

Mae rheoliad 10 yn dirymu Rheoliadau Cynllun Taliad Sengl a Chynlluniau Cymorth y Polisi Amaethyddol Cyffredin (Cymru) 2005, O.S. 2005/360 (Cy.29) a'r diwygiadau iddynt, a Rheoliadau Cynllun Taliad Sengl y Polisi Amaethyddol Cyffredin (Neilltir) (Cymru) 2005, O.S. 2005/45 (Cy.4) a'r diwygiadau iddynt.

Ni pharatowyd Asesiad Effaith Rheoleiddiol gan fod y darpariaethau yn y Rheoliadau hyn naill ai'n parhau trefniadau sy'n bodoli eisoes, neu, yn achos y ddarpariaeth ynglŷn â choedlannau cylchdro byr, yn achosi cost ychwanegol ddibwys i fusnesau.